Aldobrandino da Siena, Régime du corps, metà XIII sec.
Le régime du corps de maître Aldebrandin de Sienne. Texte français du XIII^{e} siècle, publié pour la première fois d’après les manuscrits de la Bibliothèque Nationale et de la Bibliothèque de l’Arsenal par Louis Landouzy et Roger Pépin, Paris, Champion, 1911.
Edizione digitalizzata a cura di Serena Modena
Marcatura digitale a cura di Luigi Tessarolo
Permalink:
VI. DU BAIGNIER
[1] Por che ke baingniers est divers selonc le diversité des ewes, si vous dirons premierement le diversité des ewes qui sont boines por baingnier et à coi eles font bien et mal; apriès vous dirons comment on doit user le baingnier. [2] Totes les ewes en coi on se baingne ou eles sont doces ou d'autre maniere, si com sont ewes qui <ont> nature de soufre, et autres ki ont nature d'alun, autres qui sont salees, autres qui sont ameres, autres ki ont nature de salnitre, autres ki sont gissees, autres ki ont nature de fer, autres ki ont nature d'arain; autres ewes sont de mer, et totes ces ewes, ki par leur nature sont douces premierement, prendent autre[s] nature par les conduis où eles passent, si com celes qui ont nature de soufre. [3] Car en lor conduit a soufre, et par le passer qu'ele fait enki, si cange se nature || et escaufe; et ensi poés entendre des autres.
[4] Et totes ces ewes ki sont teles naturelment, si les puet on faire par artefice, si com de faire boulir soufre en ewe douce, et ensi des autre.
[5] Mais, por ce que li baigniers en ces ewes n'est mie couvignables à celui qui veit santé garder et ki a le cors sain, mais, sans plus, por les maladies delivrer, si en parlerons nous briefment por ce que ce n'est mie de no entention.
[6] Saciés que totes ewes salees et soufrees et de mer valent à maladies froides et moistes si com sont goutes, as maladies des rains, et à ydropisie de froide et de moiste nature, à rougne de fleu||me ki rent moult d'ordure et toutes autres maladies de si faite nature. [7] Et de teles aighes se doivent garder cil ki sont magre et de seche et de caude nature, et ki ont roigne de cole k'il amagrissent et desechent, et leur escauffe li fies et leur done fievre et caude maladie, si com etike, causon, et autres maladies assés. [8] Aighes ki sunt d'alun, et de gis, et de fier, et d'arain, si refroident et desecent et sont bones à maintes maladies si com || à chiaus ki rakent sanc et le gietent fors, et as menisons, <et à privees maladies de femmes> quant il en abonde trop, et à trop vomir et autres maladies assés.
[9] Li baigniers en ewe douce fais en estuves et en cuves, et en ewe froide. [10] Cil ki velt se santé garder et sera sains et se fera baignier en estuves et en cuves, si se gart qu'il ne demort mie trop; fors tant qu'il puist sen cors laver et soi netiier de l'ordure que li nature cache fors par les pertruis de le char, car d'autre cose n'a il mestier.
[11] Ne ne covient que il se baigne apriès mengier, por ce que li caleurs du baing atrait fors le caleur naturel ki devroiet cuire le viande, et por ceste meisme raison, ne doit on mie mengier ou baing, fors seulement cil qui sont maigre et sec qui welent leur cors encraissier, mais tes craisse n'est mie boine; mais qui faire le veit et mestier en a, si le faice quant li viande commence à cuire ou fons de l'estomach, et puis boive .i. pau d'oximiel; se c'est cose qu'il soit de caude nature, si puet user de piaperon et || dyamentastrum, et autre caut laituaire sont boins à chiaus qui sont de foible nature. [12] Ches coses sont boines por les maladies eskiwer ki puent avenir por le boire et por le mangier ou baing.
[13] Encore se couvient il garder et atargier de mengier ou baing et apriès çou c'on est baigniés, por ce que li caleurs naturaus afoiblist du baignier; et ne se couvient mie baignier apriès grant travail, ne boire ewe froide devant le baignier ne ou baing. [14] Car por le baignier sont les voies aouvertes si que li ewe porroit aler es principaus menbres du cors et metre le vertu à nient; et encore boire ewe bien caude ou baing et devant mengier est malvaise cose, por ce qu'ele porroit faire l'oume devenir etike et tesike.
[15] Et à l'issir du baing, covient que on se gart de froit et que on se cuevre bien de reube, principalment en yver por le froidure de l'air; et quant il sera repossés, à l'isser du baing, si mengue atempreement tele viande que ses estomas puist soffrir et bien cuire le viande sans le vertu mout travillier.
[16] Et devés savoir que li baing||niers d'ewe caude [et de froide et de] douce, au coumencement, fait le cors devenir moiste et atempré, et por longement demorer, escaufe le cors et deseke.
[17] Ki se veut baignier en ewe froide si prenge garde au premierement à sa complexion, qu'il ne sente reume ne autre maladie qui li puist grever, et en esté ne mie en yver, et qu'il ne se baingne pas tant que li froidure li grieve ne que si menbre li refroident; et que ce soit quant il vaura se caleur naturaument conforter, car ki se baigne en ewe froide ordeneement et selonc ce qu'il doit, il fait le caleur dedens le cors remuer et enforcier.
